Conto Artikel Basa Sunda

Judul : Mangpaat Tahajud

Ragam bahasa : Loma

Karya: Guru Bahasa Sunda SMA Plus Tauhidul Afkar

Tahajud nyaeta Hudang peuting tina sare pikeun migawe sholat kadang mah sok diliwat ku kalolobaan jalma kalawan sagala rupa macem alesan, misalna bae kusabab tunduh, cape tas gawe, talangke, jeung lain sajabana. Aya oge nu alesan keun bae da aya isuk deui.

Padahal mah tahajud teh ngabogaan mangpaat nu alus keur ngubaran hate urang tina rereget dosa. Nu mana lamun urang tahajud kucara hudang peuting, terus ka cai pikeun wudlu, diteruskeun kana sholat bisa jadi nu matak mawa kana leahna hate nu ngabalukarkeun gampilna ngenclakeun cimata. Anu mana cimata peuting matih kana ngundang pangampurana pangeran.

Saha jalma anu dihampura ku pangeran, maka bakal ngalaman hirup anu genah tumaninah, digampilkeun tina sagala urusan. Bisa jadi, ku genah jeung gampilna nepika aktifitas pagawean naon bae nu keur dipilampah oge asana teh hampang himping. Ku hal ieu, sing inget, mangsana datang peuting pek hudang pikeun sholat sanajan dua rakaat. Lamun tea mah tacan biasa, hayu urang maksakeun, rek di masjidna, rek di imahna, rek di lembur sorangan atawa di lembur batur. Pokona mah, taya peuting tanpa tahajud.

====================

Judul : Dhuha syukur saukur teu kaukur

Ragam bahasa: Loma

Dhuha nyaeta sholat isuk-isuk dina mangsa meletekna panonpoe, sok loba kapopohokeun ku kalolobaannana jalma ku sabab kasibukan sewang-sewangan. Dhuha nu dilakonan dina kira-kira tabuh 06:15 isuk-isuk nepika kurang leuwih tabuh 11:00, nyempil dina waktu anu cenah kagok ngagokan gawe.

Sok padahal, dhuha teh hiji bentuk ibadah sholat sunat anu pahalana sakitu mundelna. Sholat dhuha dua roka'at bisa ngabandingan kana syukur nikmat anu dipaparinkeun ku Alloh SWT. Hiji nikmat nu teu karasana dina harti kapopohokeun, nyaeta nikmatna sehat anggahota badan. Ku sholat dhuha dua roka'at, bubukuan nu aya dina saligar awak disyukuran tawis ngahaturkeun nuhun Ka Alloh kana sehatna awak. Sajaba ti eta, sholat dhuha teh matak narik-narik kana rezeki, sok padahal nu pang utamana mah karidona Alloh SWT.

Hiji jalma nu kumelendang di alam dunya, dina ngambah hirupna teu leupas dina kasab jeung ikhtiar. Anu mana kasab jeung ikhtiar tangtuna oge kudu dibarengan ku kasehatan jeung kaafiyatan, da ari teu sehat mah rek kumaha bisa usaha.

Usahana hiji jalma dina neangan kahirupan aya nu jadi guru boh guru ngaji atawa guru sakola, patani, padagang jeung sajabana. Kabehanana bisa maksakeun miga sholat dhuha, naha dina memeh inditna keur diimah keneh, lamun tea inditna isuk-isuk, atawana geus ditempat gawena sewang-sewangan.

Teu matak jadi panghalang hiji patani migawe sholat dhuha di kebonna atawa di sawahna, ceuk cohagna najan lamokot ku taneuh ataw leutak, atawa ribug jibrug ku cai; lamun tea mah padagang ku ngaladangan pelanggana, da tangtuna aya waktu nu bisa dicongcaykeun. Nu penting mah daek atawa henteuna, mun can daek mah hayu atuh urang maksakeun.

Judul: Puasa Sunat

Ragam bahasa: Loma

Puasa, hiji padamelan nu kagolong ibadah ku cara ngantunkeun tuang sareng eueut ti kawit mangsa janari, sakedap deui ka subuh dugika surupna panonpoe. Carana tuang sanajan sahuap dua huap, kira-kira 10 menitan deui ka bade subuh, ihtiatna mah, ulah dugika kaadzanan.

bersambung.......