Daring Sunda XI - Bab 3 | Panumbu Catur

DaRing Bahasa Sunda Kelas XI

Bab 3 | Panumbu Catur

Eusina Teh

1. Definisi
2. Pancen/Tugas
3. Lengkah-lengkah Persiapan
4. Cara-cara Mangsa Prungna

Definisi

Panumbu catur (Ind.: moderator) téh kaasup kana mingpin diskusi, nyaéta jalma nu dipercaya nyekel kadali pikeun ngatur patali marga di antara pamilon diskusi.

Pancen/Tugas

Panumbu catur boga pancén pikeun ngatur, ngalelempeng, ngaping, sarta miara lumangsungna diskusi nu teu leupas tina cara atawa téhnik mingpin diskusi.

Tanggung jawab panumbu catur kaitung beurat lantaran hasil henteuna diskusi gumantung ka dirina.

Tugas panumbu catur, di antarana:

1. Ngajaga atawa miara lancarna diskusi.
2. Ngalelempeng (ngarahkeun) jalanna diskusi sangkan kahontal tujuan nu dipiharep.
3. Nampung jeung ngamalirkeun kahayang katut pamadegan pamilon diskusi.
4. Nyieun kacindekan saheulaanan tina hasil diskusi.
5. Ngarumuskeun hasil nu bisa ditarima ku sakumna pamilon diskusi.

Lengkah-lengkah Persiapan

Kumaha prak-prakan nalika hidep jadi panumbu catur atawa jadi moderator?

Pikeun jadi panumbu catur tangtuna hidep kudu ngalakukeun léngkah-léngkah atawa nu kudu disiapkeun nyaéta:

1. Persiapan pribadi, di antarana:
1. Siap bahan-bahan nu dipaké pikeun ngatur diskusi/sawala.
2. Mibanda gambaran nu jelas ngeunaan sasaran atawa hasil tina diskusi/sawala.
3. Siap nyanghareupan sagala hal nu bakal kajadian, upama aya béda pamadegan atawa pendapat, kamungkinan jawabanana.
2. Persiapan pikeun nyanghareupan pamilon (audien), di antarana:
1. Komunikasi nu alus jeung pamilon.
2. Mikawanoh karakter (watek) umum para pamilon saméméhna.
3. Alusna mah aya patali nu loma (akrab) saméméh diskusi/sawala lumangsung.

Cara-cara Mangsa Prungna

Sabadana hidep tatahar pikeun jadi panumbu catur, satuluyna kumaha carana nalika hidep keur jadi panumbu catur atawa nalika numbu catur.

Cara-carana nyaéta hidep kudu niténan sawatara hal ieu di handap:

1. Merhatikeun tata cara sopan santun protokolér di hiji wewengkon atawa daérah.
2. Omongan panganteur atawa pangjajap kana kagiatan diskusi/sawala alusna singket tapi jelas (jéntré).
3. Miboga sikep objéktif tur narima atawa ngahargaan (terbuka) ka sakur pamilon.
4. Kudu bisa meper pamilon nu patorong-torong ku cara nu alus tur gedé pangaruhna (pérsuasif).
5. Omongan panumbu catur bisa ditarima ku para pamilon.
6. Usahakeun diskusi dibuka saluyu jeung waktu nu geus ditangtukeun.
7. Tepikeun jejer jeung bahan diskusi ka hadirin.
8. Wanohkeun para pangjejer; ngaranna (lengkep jeung gelarna), profésina, kaahlianana, jeung data pribadi séjénna nu aya patalina jeung jejer katut bahan diskusi.
9. Tepikeun tata-tertib diskusi sajelas-jelasna.
10. Ngahaturanan pangjejer keur nepikeun bahasanana, disusul nampung jeung ngatur para pamilon nu rék milu mairan atawa nanyakeun.
11. Tutup diskusi panceg dina waktuna.